அண்மையில் நடைபெற்ற புத்தகக் கண்காட்சியில் நீ கலந்து கொண்ட அனுபவத்தைப் பகிர்ந்து கொள்ள உன் தோழிக்கு ஒரு கடிதம் எழுதுவது எப்படி என்று இப்போது பார்ப்போம்.
சி.மீனாட்சி,
21/97, எழில் நகர்,
சுபம் தெரு,
மதுரை.
தேதி:08/09/2022.
அன்பு தோழி ராதைக்கு,
வணக்கம். நான் இங்கு நலம். என் குடும்பத்தினர் அனைவரும் நலமாக உள்ளனர். அதே போன்று உன் குடும்பத்தினரும் நலமாக இருப்பார்கள் எனப் பெரிதும் நம்புகிறேன். தோழியே, முன்பு நான் தெரிவித்தது போல, அண்மையில் பாண்டியன் நகரில் நடைபெற்ற புத்தகக் கண்காட்சி ஒன்றுக்குச் சென்றிருந்தேன்.
அங்குச் சிறுவர்கள், பெரியவர்கள் எனப் பலரும் வந்திருந்து தங்களுக்கு வேண்டிய நூல்களை குறைவான விலைக்கு வாங்கிச் சென்றனர். அங்கு அடுக்கி வைக்கப்பட்டிருந்த ஆயிரக்கணக்கான நூல்களைக் கண்டு நான் மலைத்துப் போனேன்.என் வாழ்நாளில் இத்தகு நூல்களை நான் பார்த்ததில்லை.ஒரு பக்கம் அறிவியல் நூல்கள்; வேறொரு பக்கம் சமூகவியல் நூல்களென எங்குப் பார்த்தாலும் நூல்களே தெரிந்தது.
மாணவர்களுக்குச் சிறப்பு தள்ளுபடி தரப்பட்டிருந்ததால், ஆசிரியரின் துணையுடன் நான் அறிவியல் மற்றும் கணிதம் தொடர்பான சில நூல்களை வாங்கினேன் அவ்விடத்தை நான்கு மணி நேரம் சுற்றிப் பார்த்தப் பிறகு தான் நான் வீட்டிற்கு வந்தேன். மீண்டும் வாய்ப்பு கிடைத்தால் அக்கண்காட்சிக்குப் போய் வர வேண்டும் என விரும்புகிறேன்.
சொல்ல மறந்து விட்டேனே, நான் சென்ற தினத்தன்று அங்கே ஓர் அசம்பாவிதம் ஒன்று நிகழ்ந்தது.ஆம், ஒரு சிறுவன் பேழையில் அடுக்கப்பட்டிருந்த புத்தகங்களை எடுக்க முயற்சிக்கும் போது அங்கிருந்த புத்தகங்கள் நழுவி அவன் மேல் விழுந்தன. பாவம், அந்தச் சிறுவன் வலியால் துடித்தான். அவன் தாய் ஓடி வந்து அவனைக் காப்பாற்றியக் காட்சி இன்னும் என் மனக்கண்ணை விட்டு அகலவில்லை.
நல்லது தோழியே, இத்துடன் நான் என் மடலை முடித்துக் கொள்கிறேன்.அனைவருக்கும் என் வணக்கத்தைத் தெரிவிக்கவும்.
இப்படிக்கு,
உன் அன்பு தோழி,
சி.மீனாட்சி
--------------------------------------------------
குறிப்பு:
அண்மையில் நடைபெற்ற புத்தகக் கண்காட்சியில் நீ கலந்து கொண்ட அனுபவத்தைப் பகிர்ந்து கொள்ள உன் நண்பனுக்கு ஒரு கடிதம் எழுத எழுத கூறுனாலும் இதே கடிதத்தை பயன்படுத்தி கொள்ளலாம் (கடிதத்தினுள் தோழி என்று வரும் இடத்தில் தோழன் என்றும் பயன்படுத்தலாம்)